كل الامور فبعضها متشعبه مير الاصول
منهو فهمها لانزل ففروعها فهمه دليل
المشكله تكرار طرح المشكلة دون الحلول
تزداد سوء بخنثرة خنثور وفخبث الذليل
ماكل قول تصدقه لاتعني الغيمه هطول
والقول لاتبديه لامن عودت قالٍ وقيل
والله يرحم امرءٍ يعرف قدر نفسه يقول
اللي يطوله مايقول اللي على راسه طويل
وواحدٍ مافيه خير اخير من راع الفعول
اللي يسوي خير ثم يمن من بعد الجميل
وقت الرخا شام ويمن ياكثرهم تلقى الزحول
وفقل فالشده لكن افعالهم ماهي قليل
ترا العدد ماهو مهم اليا نوت بعض الفحول
روح انظر اليرموك فاليرموك تلقالك دليل
منهو درى فيما مضى شاللي جرى وصف الذهول
يزول منه فما يصير اليوم قتّال وقتيل
وترا السواعد والقلوب ان كان ماتملك عقول
بتنحرق طاقاتها وتروح ماتلقا حصيل
من قال بان الجهل ظلمه ناسي انه فيه هول
بيهلك اللي يتبعه يصبح بلا عزمٍ وحيل
والخيل دون لجام كيف تكون ياربع الخيول
اها سواة العلم دون الدين معّوج ويميل
الدين من اول نفس لاخر نفس دين الشمول
مثل الهوا ماهو هوى سنة بعد وحي الجليل
••••••••••••••••••••••••••••••••••••••••••••••••
فهد طالع الغانمي