سوق الهياط يبيع به كل هايم
عن الرشاد وهدي سنة رسوله
****
و يسج به رجل ردي العزايم
مطيته عن الركاب معقوله
****
ينفخ بذربه مثل طير النعايم
وان كبرت القاله تراعد رجوله
****
ماله على طيب الفعايل وسايم
مهما لبس من لبس تبْدِي خلوله
****
يرز نفسه مع رجال العظايم
وعند اللزوم خلاف يشعب ذلوله
****
تحداه عن درب المراجل سمايم
ان عاش ولّا مات ناقص رجوله
****
عزمه ضعيف ولا يروم الكرايم
رجله على درب المعالي كسوله
****
أكبر مشاريعه حضور الولايم
ولّا عن الطاعات نفسه ملوله
****
عليه من روس النشامى ملايم
مهايطٍ والطيب يجهل سبوله
****
والوقت سوّى بين صاحي ونايم
متساوين في الوقت عرضه وطوله
****
وقتٍ من أهواله تطيح العمايم
ويرفع من البيدا الغبار بسهوله
ــــــــــــــــــــــــــــــــ
أبو مفلح/ حامد بن جابر السلمي
جدة في ٢١ جمادى الأولى ١٤٤٧هـ