ودٍّ على شان المصالح ما أطيقه
ما أكره ولكن ما أتودد لمصلوح

وأودّ وإن ودّيت ما لي طريقة
إلا طريق الطيب دايم على وضوح

ومن ودّني بالطيب فأنا رفيقه
أفرح مع فرحه وإذا ناح بأنوح

وإن ضقت ما أبوح الخفايا العميقة
وأشوح عن عينٍ عن عيوني تشوح

وإن جيت بأطالع بعين الحقيقة
ما من ودادٍ ينعش ويبسط الروح

كود الثنين اللي عليه شفيقة
لمساتهم وفخاطري وين ما أروح

غيابهم ما أقواه لو هو دقيقة
يرضى علي اليا رضوا فرد سبّوح

أبوي وأمي برّهم لو تعيقه
نفسي فأنا الذبّاح لا طحت مذبوح

••••••••••••••••••••••••••••••••••••••••••

الشاعر: فهد بن طالع الغانمي