فكري اللي عن سموه ما تخلَّى
ما يبوق ولا يصاحب كل بايق
****
ان صمت صمته وَقارَه وإن تجلَّى
ما يزوِّر فالعلوم و فالحقايق
****
يعرف الدرب السليم ولا يذلَّى
غير من ربٍ خلق كل الخلايق
****
وان مشى في الدرب رجله ماتزلَّى
قبل ما ياطى يجنبها العوايق
****
من سواليف النشامى ما يملَّى
ما جلس في مجلسٍ ما هو بلايق
****
لو على ماقيل رحب به وهلَّا
شفِّه الوجه النقي والبال رايق
****
و ان عرض له عاقةٍ صار يتحلَّى
بالتحلُّم والعفو والعقل فايق
****
وان تكدر خاطره وضّا وصلَّى
ينشرح باله ولو البال ضايق
****
يعرف إن الشمس تنحى كل ظلَّا
وفق توقيت الثواني و الدقايق
****
والحياه تمر لوفيها تسلَّى
مثل غيمه يا وسيعين البنايق
****
من غفل مثل الرواعي في المفلَّى
ما تفيده يوم تفتيش الوثايق
ــــــــــــــــــــــــــــــ
أبومفلح/ حامد بن جابر السلمي
مدير عام التعليم بمنطقة مكة سابقا
جدة في ٧/ ٤/ ١٤٤٧هـ