قلها قصيدة من خيار الطواريق
قلها براس الضلع ولاّ سهلها
****
يسمع صداها ربعك اللي مشافيق
على النبا الطيب تبرهن عملها
****
قلها و وثقها يا بو زيد توثيق
عشان يعرف علمها من جهلها
****
عن اللوازم ما تجوز المداريق
فِسْهولها و لاّ بقمة جبلها
****
تبغى صميدع يورق العلم توريق
ينقض منون الحبل ولا فتلها
****
لو انها صعبه وتابس بها الريق
يركي لها متنه وفوقه حملها
****
ما يرتخي متنه ولا حَافِه الضيق
لو كثرة القالات متنه جملها
****
طير السعد ماهو سواة الغرانيق
اللي على شط البحر مجتولها
****
أهل اللوازم فاللوازم كما طويق
ولّا حصاة الضلع يعرف جبلها
****
جنب عن اللي ما يصون المواثيق
خلّه بِنِزْلَه في حياته نزلها
****
واطلب من الخلاق رب المخاليق
يدفع حبال السو واللي حبلها
ــــــــــــــــــــــــ
أبو مفلح/ حامد جابر السلمي
جدة في ١٤/ ٤/ ١٤٤٧هـ