ابعد عن تويتر وجنّب الواتس
وخلّك عن سناب المشاهير مقفي
ما نابني منهم سوى علة الراس
وضيقة صدر في تالي الليل تلفي
ما لي ومال اللي يسوونه الناس
ذنبي كبير وشايله فوق كتفي
يا الله عسى ما يجي قلبي الياس
من رحمتك .. ياعالم بحال ضعفي
في ذا الزمن حدّد مجالسك بقياس
ثنين أو ثلاثة من حبايبك يكفي
في خيمةٍ يسري لها كل نسناس
يحلا الكلام ويسهر الليل طرفي
وأعواد سمرة مستجلات يِبَّاس
نارها لا شعشع الصبح تطفي
والبن الأخضر يحترق جوف محماس
يروي حكاية تنتهي بصوت رشفي
ومن شاهي الكبّوس حط أربع أكياس
وخذ لك مع الفنجال لا صِب سلفي
والحاشي المضغوط مع رز أبو كاس
من بعدها جو السواليف يصفي
ويشوقني عامل تماتيك نوماس
من وين ما جيته ألاقيه خلفي
نشمي شقردي ما هو في كل الأجناس
يخون في مدحك يا أبو زيد حرفي
والمال ما هو للرجاجيل مقياس
يا كم ثري ذكره مع الناس منفي
حمله من المعروف مثقال قرطاس
يقطعك يا عِدٍ عن الناس مخفي
والناس فيها من يثمن بالألماس
وأكرمهم اللي من عن الناس يعفي
وصلُّوا على أطهر من على اليابسة داس
أزكى صلاةٍ من عنا الضيق تشفي
••••••••••••••••••••••••••••••••••••
إبراهيم أحمد الصحفي