يا الملهمة يا روح روح القصايد
يا عشقي الغامر يا منتوقة الجيد
لك الغلا والعشق فالقلب شايد
يا فارعة بالحسن عن زاهي الغيد
كل يوم حبك يالغلا في تزايد
ونجدده فأقصى المعاليق تجديد
باهي جمالك عن ذرى البيض نايد
ما لك شبيه وعن محبتك ما نحيد
يا مملكة عزٍّ بالأمجاد سايد
يا بهجة الحاضر ويا ماضي الصيد
عليك عيدك بالفرح دوم عايد
يا فرحة الدنيا ويا نكهة العيد
يا دارنا حزتي صنوف الفرايد
يا دولةٍ قامت بسنّة وتوحيد
يا دار تقوى في عظيم الشدايد
من عهد عودٍ وحّد الناس توحيد
في يوم له ذكرى موكّد وكايد
عز وفخر نوره على العالم يسيد
فيه الوطن حاز الشرف والفوايد
لين احتكم رأي ومعزة وتشييد
واليوم لك سلمان بالحزم قايد
أمن وأمان وخير من ربنا يزيد
وولي عهده فالمهمات فايد
مهندس الرؤية بحنكة وتسديد
محمد اللي للمعادين كايد
يضرب بسيف يبدد الظلم تبديد
هذي بلاد المجد وأهل العوايد
مهبط وحي ما دنّسوها المقاريد
خيراتها مثل المزون السدايد
بذل وعطا وإصلاح للفرقة يبيد
محمية الأركان عن كل صايد
وعدوها دنياه همٍّ وتنكيد
يا رب تحماها شرور المكايد
وتزيدها رفعة ونُصرة وتمجيد
•••••••••••••••••••••••••
دخيل الغانمي