الشاعر حامد الحمراني يرثي والده في قصيدة مؤثرة
يا أول الأحزان والحزن الأخير
ياكل حزن الكون وهموم البشر
***********
لا والله الا احساس قلبي اليوم غير
ومشاعري متلاطمه مثل البحر
***********
ياثقلها الليله وياطول المسير
من ثقلها حسيتها مية شهر
***********
ليلٍ كئيب وحزن شره مستطير
ضاق الفضاء والارض ضاقت والصدر
***********
حلفت ماكتب شعر لو مهما يصير
لن القوافي ماتوفي لك قدر
***********
لكن هواجيسي لفتني تستجير
مماتشوف اللي سكن بي من قهر
***********
بكيت قبل الدمع بالدم الغزير
من قبل لاعيني تهل الك العبر
***********
منهو يلوم القلب يوم امسى كسير
على فراق ابوي يلقى لي عذر
***********
غاب الذي كوني بنوره يستنير
اللي يحل الصعب ويفك العسر
***********
وقت الشدايد كنه السيف الشطير
وفي حضرته كل المصايب تندحر
***********
من طيب فعله حي له صيتٍ كبير
وبعد الممات مخلدٍ نعم الذكر
***********
يالله طلبتك رحمتك وانت القدير
وله جنه الفردوس تجعلها مقر
***********
وبه نجتمع فيها بلبسٍ من حرير
واستبرقٍ ومرافقة خير البشر
***********