شعر وشعراء
بإشراف فايز العطاوي
العمر عيشه عزيز ولاتعيشه ذليل
ولايشغلك في حياتك عن صلاتك شغل
°°°°°°°°°°°°°°°°°°°°°°°°°°°°°°
تلقى السعادة على وجهك وهذا دليل
إن السعادة تجي لك مع صلاح العمل
°°°°°°°°°°°°°°°°°°°°°°°°°°°°°°
احرص على اللي يفيدك بالنهار الطويل
واحرص على المنفعه وانفض غبار الكسل
°°°°°°°°°°°°°°°°°°°°°°°°°°°°°°
لايفوتك العمر وانت صفر مامن حصيل
إن راح عمرك ترى الترجيع ماهو سهل
°°°°°°°°°°°°°°°°°°°°°°°°°°°°°°
الدين نعمة كبيره ماله اية بديل
والله تعالى لمن طاعه وصلى كفل
°°°°°°°°°°°°°°°°°°°°°°°°°°°°°°
واحرص على المرجله واشمخ شموخ النخيل
كل الأوادم يحبون ارتفاع النخل
°°°°°°°°°°°°°°°°°°°°°°°°°°°°°°
اثبت على شداد ريمه وانتبه لاتميل
سر النجاح ( الثبات ) اللي يقول المثل
°°°°°°°°°°°°°°°°°°°°°°°°°°°°°°
وابعد عن الشح لاينقال هذا بخيل
أخس حاجه تجي بالرجل طبع البخل
°°°°°°°°°°°°°°°°°°°°°°°°°°°°°°
وان جيت بالمجلس المليان خلك ثقيل
أهم شئ اتصف قدامهم بالثقل
°°°°°°°°°°°°°°°°°°°°°°°°°°°°°°
اسمع وسولف وجيب من الكلام الجزيل
بالقول والا الفعل خلك سنافي جزل
°°°°°°°°°°°°°°°°°°°°°°°°°°°°°°
وعن كثرة الهرج يغنيك الكلام القليل
لازاد هرجك يقولون الأوادم خبل
°°°°°°°°°°°°°°°°°°°°°°°°°°°°°°
وابعد عن المجلس اللي فيه قالٍ وقيل
من جاب كلمة بياخذ منك عشره دبل
°°°°°°°°°°°°°°°°°°°°°°°°°°°°°°
ولين جنابك لخلق الله ورد الجميل
هذا الكلام الصحيح اللي مايقبل جدل
°°°°°°°°°°°°°°°°°°°°°°°°°°°°°°
ولاتخاوي الا رجل مطنوخ وافي وأصيل
معروف بالصدق بين الناس وأصل وفصل
°°°°°°°°°°°°°°°°°°°°°°°°°°°°°°
علم ولدك المراجل قول طالع سهيل
مخاوي الجدي عن مكانته مانزل
°°°°°°°°°°°°°°°°°°°°°°°°°°°°°°
لاتقصر الطّيب عن جار ورفيق وزميل
وإن ثقلت الحمله اشتلها وخلك جمل
°°°°°°°°°°°°°°°°°°°°°°°°°°°°°°
عيش الحياة القصيرة وانت وافي نبيل
وإن جات سيرتك قالوا عنك شامخ بطل
°°°°°°°°°°°°°°°°°°°°°°°°°°°°°°
ومهما تعيش بحياتك مقتفيك الرحيل
لابد نسمع فلان الله يبيحه رحل
°°°°°°°°°°°°°°°°°°°°°°°°°°°°°°
وصلوا على اللي بعث ناصح ومعه الدليل
محمد اللي دعانا كلنا للعمل
°°°°°°°°°°°°°°°°°°°°°°°°°°°°°°
الشاعر ناهي الجابري (شاعر الحجاز)