الشكر للي وجب للادمي شكره
لا له شريك على ملكه ولا والي
°°°°°°°°°°°°°°°°°°°°°°°°°°°°
والشعر حنا هله وشلون نحتكره
نغوص ببحوره من الجال للجالي
°°°°°°°°°°°°°°°°°°°°°°°°°°°°
احيان تخطر على بالي 100 فكره
وأحيان والله ولا فكره على بالي
°°°°°°°°°°°°°°°°°°°°°°°°°°°°
افكار متكرره وافكار مبتكره
وانا حريصً على طرقي وموالي
°°°°°°°°°°°°°°°°°°°°°°°°°°°°
احرص اللي عقول الناس تفتكره
شيٍ لا مر القلوب يخش طوالي
°°°°°°°°°°°°°°°°°°°°°°°°°°°°
الوقت خلى مزاجات العرب عكره
وليا صفى للعرب ماهو بيصفالي
°°°°°°°°°°°°°°°°°°°°°°°°°°°°
مافيه ضب خلقه الله بلا عكره
فلا تظن البحر مثل الخلا الخالي
°°°°°°°°°°°°°°°°°°°°°°°°°°°°
لا تامن الماكر ولا تامن بمكره
المكسب احيان يفني روس الاموالي
°°°°°°°°°°°°°°°°°°°°°°°°°°°°
المؤمن الحق لا يبغض ولا يكره
ولا هو بمتكبر ولا هوب متعالي
°°°°°°°°°°°°°°°°°°°°°°°°°°°°
متواضع الخلق فالمنشط وفالمكره
لو يشرب المر كنه شارب الحالي
°°°°°°°°°°°°°°°°°°°°°°°°°°°°
من لا مشى اليوم ما يمشي بعد بكره
حتى لو ان الدروب أعراض وطوالي
°°°°°°°°°°°°°°°°°°°°°°°°°°°°
كم حرً اشقر ينام البوم في وكره
اللي مسويه فوق المرقب العالي
°°°°°°°°°°°°°°°°°°°°°°°°°°°°
لا عاد تستغرب ليا هدرت البكره
هذا الزمن يجمع الاول مع التالي
°°°°°°°°°°°°°°°°°°°°°°°°°°°°
الشاعر متعب المحمادي