يامل قلبً كنّه بجوف محماس
يصلى سوات البن لاصار محموس
********
يفز قلبي كل مادق هوجاس
فزّت صقر لا فز من كف محروس
********
وأعوذ بالخلاق من كل وسواس
لا دق في قلبي من الضيق هاجوس
********
يطري عليّه ذكر بالفعل نوماس
فيه الوفاء والصدق والطيب مغروس
********
مايتبع النمات في كل مجلاس
ولاهو على بيوت المخاليق جاسوس
********
تلقاه هبة ريح ودلال جلّاس
وأهل المروة والوفاء حوله جلوس
********
هرجة قفا يهرج بها كل بلّاس
واليا هرج بالكذب بيحوسها حوس
********
والخوة اللي ماتوثق على ساس
سوات تمرة داخلٍ جوفها سوس
********
لاصار ماتشعل كما النار مقباس
مثل العسل صافي وبه سم مدسوس
********
ماهو صويب اللي سلم ضربة الرأس
صويب منهو كل ضربه على الروس
********
قيّست في بعض المخاليق بقياس
لكن! خاب الظن في باري القوس
********
كلً على قدّه يفصل له أْلباس
الثوب مايصلح ليا صار ملبوس
********
والعود ماينفع اذا جاه الايباس
ماغير عود الطيب لاصار مبسوس
********
ولاكل من يقرب من البحر غطاّس
ولاكل جلدً يحتمل حدّة الموس
********
وكليب ماهمّه بعد غدر جساس
(تكتب يمينه)وأصبح العلم مدروس
********
واللي قعد للذيب في جوف متراس
الذيب حطّه بين نيبان وضروس
********
حصلّت في الاصحاب من كل الاجناس
شكل العرب والطبع من طبع هندوس
********
بعض البشر هرجه كما عقد الالماس
والبعض الاخر هرجته لدغ ناموس
********
وبعض البشر يبغاك في كل مرواس
يبغاك لامنك غني راعي فلوس
********
وان طاح حظك بعد ماجاك الافلاس
تدوسك اصحاب الرخا بالقدم دوس
********
ياوجد روحي كل ماهب نسناس
وجد اليتيم اللي بعد فقر محبوس
********
راحت حياته كلها هم واتعاس
ماله رفيقً وأصبح الحال منحوس
********
بنيت عجز الشطر الاول ع آس
والشطر الآخر قام عجزه على آوس
********
صلوا على اللي بيّن الهدي للناس
محمد اللي صارت احداثه دروس
********
فايز العطاوي