كلٍ على كيفه يفصل ثيابه
إن طول الأثواب ولاّ شمرها
وانْ جت على السنة يحصل ثوابه
في الدرب توخذ كل جره باثرها
والكل في محياه يكتب كتابه
لن عَمّر الصفحات ولاّ دمرها
والرجل يُعْرَف منطقه من جوابه
والعين يُعْرَف سرها من نظرها
والعاقل يِمَيِّز خطاه وصوابه
رجله عن الزلة وعينه قصرها
من حكمته راع الشجاعة يهابه
وان شاف خله في طريقه سترها
و حماقة الرجَّال توحش جنابه
ما يحصد البِذْرة غشيمٍ بذرها
والبخل لو انْ البخيل اعتنى به
كالشجرة اللي ما يِشَاهِدْ ثمرها
وراع الكرم لوِّ ه زمانه نبا به
سحابةٍ بالخير يهمل مطرها
والصَّيْرَمِي لوْ وَقْته أضعف ركابه
يصبر ولن شانت ذلوله نحرها
والكذب مثل اللَّال يبرق سرابه
من يتبعه يمسي حياته خسرها
والصدق نورٍ يِقْدِي اللي مشابه
وينجيه لو استحكمت من خطرها
والوقت يِحْسَبْ بالثواني حسابه
والبِيْض تعرف من منازل قمرها
والطيب مرقى يتعب اللي رقابه
إلّا صبيٍ له حياته نذرها
والبيت ما يذري بليَّ طنابه
فوقه سموم القَيْض تحكم ضررها
والله ولي العرش ما صك بابه
عمّن جِفَا الدنيا والأخرى عمرها
*****************
أبو مفلح / حامد بن جابر السلمي
جدة في ١٢/ ١١/ ١٤٤٣هـ