اجلس مع اللي شيِّبن نواصيه
على الوفى والطيب شابن عيونه
ينبيك عن وقت تلاشت مواريه
كل التجارب بين باعه وشونه
ما صار له في الوقت بالصدق يرويه
على كرامٍ شفهم يسمعونه
في مجلس ما خاب قرم يجي فيه
من جالس العراف ما يخذلونه
اهل الوجيه البيض بالمسك تحذيه
جليسهم من طيبهم يكرمونه
فيض التجارب كَنِّه الذوب تهديه
للي على الطالات تضفي بدونه
تجارب العقَّال للرجل تغنيه
عن البخيل براي ولاّ معونه
مجلس خيار القوم يرقى بناصيه
والصنف الآخر كيرهم ينفخونه
يعمي بدخانه وتكثر بلاويه
لا تدخله يا صاح لو يفرشونه
وأيامنا سجل والوقت يطويه
واللي كتب في لوحها تاجدونه
والمسعد اللي ما تغير مباديه
لو مات حي بسيرته يذكرونه
°°°°°°°°°°°°°°°°°°°°°°°°°°°°
أبو مفلح/ حامد بن جابر السلمي
جدة ١٥/ ١١/ ١٤٤٣هـ