ورجال باقي حيٍ ما تلتفت فيه
هذا على موته تحرى البشاير
****
ورجال في بعض المواقف تخاويه
ولا بعضهم خوته بالخساير
****
ورجلٍ ليا جاء مدحته تعتزي فيه
يشيل عنك حمول عند الدواير
****
ورجل مسافة يوم ما انته مخاويه
هذا يعلك علته بالخساير
****
رجل ليا جيته وتبغى تخاويه
يحسبك من جملة عيال الحرائر
****
هذاك اقنع عنَّه ولا عاد ترجيه
قنعان من خبثه قليل البصاير
****
ورجلٍ على حشمه وقيمه تباريه
ما يرز نفسه عنك ويقول ساير
****
هذا الذي ودك تحشمه وتغليه
ويصبح خوي الجنب عطه السراير
****
الناس فيها أصناف كلٍ مباديه
كلٍ على طبعه تبين النواير
****
ما كل واحد لا بس البشت يزهيه
اللي ما يحمى البشت بنقول باير
****
خمسة بعد ستين والعمر مفنيه
كل التجارب علمتنا السواير
****
والخاتمه صلوا على من نزكيه
شفيعنا يوم اللقاء والمصاير
ــــــــــــــــــــــــــــــــ
✍️ أبو عبد العزيز