الصاحب اللي تحسبه مثل عينك
أصبح زعيم أهل الردى والغوايا
*****
يضحك ولن جا لازمك ما يعينك
غدار… و الايام مثل المرايا
*****
عن الوفا والطيب ياهيه وينك
وانت تقول انك من اهل الحمايا
*****
وشبك على الشده تخلي ظنينك
تطرحك يا مكار سود النوايا
*****
قلبه على الشده منول خدينك
واليوم عافك بعد ذيك السوايا
*****
عن الوفا والصدق تقصر يدينك
ومن الحكا والكذب تكتب رِوايا
*****
ليت الردى له وسمة في جبينك
عشان ما تخدع كبار الطنايا
*****
ولاّ أنت ياراع الوفا الله عوينك
أهل الوفا تِتْعب ظهور المطايا
*****
الصاحب الصنديد خله يمينك
واللاش خله في ركون الزوايا
*****
فالصحبة امّا كفو ولاّ تشينك
اختار والأصحاب مثل العطايا
ـــــــــــــــــــــــــــــــــــــــــــــــــــ
أبو مفلح/ حامد بن جابر السلمي
مدير عام التعليم بمنطقة مكة
جدة ٩/ ٢/ ١٤٤٦هـ