وطنا ياوطنا ما شكينا في ذراك الحال
لنا حاكم وسيع بطان خطلا دايم ذراعه
*****
اليا ماتوا شعوب الأرض باللي عنقها يختال
تبا تلقى الأمان مع السعودي ساكن اضلاعه
*****
حدانا لو مايملك في الرصيد الا ثلاث ريال
يدندن باللحون وما تشوف الا تهزاعه
*****
مبادي دين تجعلنا مع الحاكم رجال رجال
نمد ايماننا ونبايعه لقيامة الساعة
*****
ماحنا مثل بعض اللي تساقط عند قُل المال
لا والله رابطين قلوبنا بالسمع والطاعه
*****
ما يلقى عندنا الواشي ياكود الجزمة أم حبال
عسى الله يكرم السامع ما حنا ناس سماعه
*****
وطنا وجهك الغالي سماك وعاتقيك جبال
ثراك القطعة اللي حبها مايصنع صناعة
*****
نسيمك كل ماعانق صدور مواطنينك قال
ياحظك ياوطن بقلوب ناسٍ فيك ملتاعه
*****
صباحك لا انبلج ذاقوا بظلك تمرة وفنجال
على سجعة حمامٍ مقتفيه الصبح بشعاعه
*****
كريمين النفوس نعزها فالحل والترحال
عفيفين القلوب اللي لتقوى الله طماعه
*****
وطن من دون حدك دم معلوق النشاما سال
نشاما ماتعرف الذل فالميقاف والراعه
*****
قسم بالله ياحبك تمكن في حشى الأجيال
غرامٍ من حرم مكة وطيبه نفح ذعذاعه
*****
على الدين الحنيف وصهوة اللي تعشق الخيال
وفوح دلالنا ينشى الولد ماغير اطباعه
*****
ياكبرك عندنا ياللي علينا ظل غصنك مال
نشوفك فجرنا اللي كل يوم نعيش مطلاعه
*****
ويشوفونك خباث الأنفس لغاياتهم سلال
يامضرب سيفنا اللي يردع الشيطان واتباعه
*****
لك التقدير وانت اللي مايعرف قيمتك محتال
يحاول ينتقص بالفبركة ويحط شماعه
*****
خبيث الطبع في دار السعودي لا استهان وقال
نبا نملا فمه طينه وتاصل لاخر خناعه
*****
تقدمنا عيال ادم بقول الله وصوت بلال
ماحنا ياوطن قبلة عباد الله بتباعه