لن قامت الهيجا وصارت معمعه
يِعْرَفْ رخوم القوم من شيخانها
*****
والقوم فيها ما تزيد عن أربعه
وأهل الوفا ما يصطغي ميزانها
*****
صنف جِرِيْ يَعدو ولا يُعدا معه
وصنف يخوض بمعمعة ميدانها
*****
وصنف لياشبت يزعزع زعزعه
وصنف يفر اليا سمع دندانها
*****
وقت القسى ما بين طحن وجعجعه
والناس تغفل عن مصالح شانها
*****
لكنها الدنيا سواة المسبعة
تاكل ثعالبها مع ذيبانها
*****
ونار الحسد فيها تسعسع سعسعه
تاكل كفوف الحسد مع ذرعانها
*****
والمسعد اللي ما حسبها مطمعه
لو حيزت الدنيا له بحدانها
*****
شوق القلوب اللاهيات ومرتعه
للغافل اللي ما عرف خسرانها
*****
تنشر خسائرها نهار المجمعه
يوم الخلايق في حكم ديَّانها
ـــــــــــــــــــــــــــــــــــــــــــــ
أبو مفلح/ حامد بن جابر السلمي
مدير عام التعليم بمنطقة مكة سابقا
جدة في ١/ ٦/ ١٤٤٦هـ