حيٍّ قطع حبل الرجا كيف ترجيه
لا عاد تنظر له بعين الرجاوي
*****
هبت له النكبا و شالت مواريه
ما عاد تنفع فيه حتى المناوي
*****
المي ما يشرب ليا شان صافيه
و العد ما يورد وجمه ضماوي
*****
يا عيد سايسته وخاب الرجا فيه
نجمه طمن بالقاع ماهو سماوي
*****
وملهي الرعيان مثله بناخيه
من جملة الاطيار ما هو نداوي
*****
من قلَّده ولّا يحاول يحاكيه
يصير عن دلّ القرانيس غاوي
*****
والليل الأظلم شين ما ينسري فيه
ألّا بنور يقدي أهل المناوي
*****
والجهل ليل أسود عقيمه مساريه
و العلم مثل الصبح نوره سماوي
*****
بني الردى ينهد من فوق راعيه
وبني العزاز مشيَّدٍ بالعلاوي
*****
الكذب حبله قاصراتٍ مشاحيه
والصدق يسمو بالكريم الجهاوي
*****
وقتٍ على العقال كثرت مغازيه
واصبح به الثعلب كما الذيب عاوي
*****
والمجد مثل طويق عسره مباديه
ما يبلغه غير الحكيم الغناوي
*****
ولّا الشجاع اللي تنشط عزاويه
يشاف فعله يوم وقت العزاوي
*****
واللي كريم وكاملاتٍ معانيه
يده كما هداج لو ه سناوي
*****
واللي عن الخلات يستر عوانيه
هذا كما نبع مصبه عذاوي
*****
واللي لربعه درع ما خاب ناصيه
يسلم ولا يسلم قريب الهقاوي
*****
ان كان بالعروة موثق مباديه
ينجيه رب الكون يوم النجاوي
ــــــــــــــــــــــــــــــــ
أبو مفلح /حامد بن جابر السلمي
جدة ٢٢/ ١٠/ ١٤٤٦هـ