العاصفة قامت بعد منتصف ليل
بأمر المليك اللي يقود المسيره
سلـمان رمــز العــز ما يقبل الميل
فخر العرب كل العـرب تســتشيره
هادي نخاه يقول ما عاد لي حيل
بمواجهه حشـد الجــنود الكثيره
إيران تبـغاها من البـحر لـ “النيل”
تنـشر مذاهب للـفسـاد الحـقيره
قال ابشــر بعزك ترانا حلاحـيل
أهل القنا واهل السيوف الشطيره
يشهد لنا التاريخ والسيف والخيل
حنا هلّ العوجا حماة الجزيره
الله جعلنا للعدا طير ابابيل
نساند المظلوم في كل ديره
يقودها شبل الملك وافي الكيل
ولي ولي العهد معه وشويره
أسطولنا يقصف قنابل بها الويل
وجنودنا تزحف وجتهم مغيره
في ربع ساعة سلموها المهابيل
الحوثي المهبول طش الذخيره
والرئيس المخلوع لا يحط ويشيل
دوره فشل والكل يعرف مصيره
العام قهويناه صفر الفناجيل
واليوم شبينا عليه السعيره
وإيران يأتي دورها فالمقابيل
نبغى نخليها سوات الكسيره
هذي السعودية ما تقبل معاديل
بالاسم والتاريخ دولة كبيره