يالله يا اللي لك نحج ونصلي
يا حي ياقيوم يا خالق الناس
********
أطلبك وانا دمع عيني يهلي
والصدرفيه من الهواجيس وسواس
********
والجسم كنه بن جوف المجلي
تصلاه نار مالها حد وقياس
********
تجلى هموم القلب دقٍ وجلي
حتى يطيب ويهتني عقب الاتعاس
********
وان كان يا قلب العنى ما تملي
زود على همك تبي تلبس الطاس
********
اكفخ بجنحان السعد لا تذلي
واسلك طريقك لو على حد الامواس
********
خل الزمان اللي تولَّى يولِّي
المجد عالي وانت في قمة الراس
********
من قوم في الميقات ما تستخلي
تحمى المواقف لو على قطف الانفاس
********
حريبهم ما بين شمس وظلي
تجرع الامرار كاسا ورى كاس
********
وصديقهم من طيبهم ما يملي
تدرى حقوقه لو الارياق يباس
********
والضيف عن ديوانهم ما يزلي
للمرجلة والعز والمجد نبراس
********
ويا غافل الايام ما ترحم اللي
عن واجب الأقراب مقفي ونعاس
********
ولا ترحم اللي عن لزومه يجلي
يوم النشامى تصطلي باشقر الماس
********
ولا ترحم اللي من صلاته يخلي
ضعيف نفس وبين الاجواد خناس
********
أنعم برجالٍ لضيفه يهلي
متسلسل في الطيب من جده الساس
********
وانعم برجالٍ فعوله تسلي
للخير معوانٍ وللشر حبّاس
********
من دون ربعه مثل ضلعٍ مطلي
ريف ودفى للي عليه الدهر داس
********
دايم لمعضلة المشاكل يحلي
بالعرف ما هو بين الاثنين بلاس
********
وصلاة ربي عِدْ ما وبل هلي
على نبي مرسلْ لكل الاجناس
********
أبو مفلح/ حامد بن جابر السلمي
مكة عام ١٤٣١هـ