العلم نطلع له برووس المراقيب
وعلم الخطا يا صاح مقفول بابه
********
واهل الوفا تكمل جميع المواجيب
وعلمٍ ما ينفع سامعه وش يبابه
********
الله على رجل حصان المطاليب
كريم سبلى والثعالب تهابه
********
والعيب يبعد عن كرام الأشانيب
ويسكن مع اللي علته في غبابه
********
اللي ينمق هرجته بالأكاذيب
عند الحقيقة ما يثَمَّن جوابه
********
لو يبتسم قلبه خبيث الهناديب
اللؤم تحت عمامته من شبابه
********
الكذب ظلمى مثل سود الغرابيب
والصدق نورٌ في الدجا ينسرابه
********
والوقت يعطي كاملين العذاريب
فرصه ليشهر سمعته من سنابه
********
ياكثرهم يا قلهم لن عوى الذيب
أفعالهم في سوق بقعا تشابه
********
ماهم كما اللي يعسفون الأصاعيب
لو الزمن كشر بسنه و نابه
********
بالعرف والحكمة وطيب الأساليب
تاقف مع اللي هم قلبه سطا به
********
و دِّير عن صدره كثير اللواهيب
ما فكرت في العود الاعوج ودابه
********
لون المواقف لون حرش العراقيب
وكلٍ على ما قيل يكتب كتابه
********
أبو مفلح
جدة. ١٤/ ٤/ ١٤٤٥هـ