عايشت جو الشفا اسبوع
لاشي رطوبه ولا ملهاب
غران جوه يصد الجوع
حره وبرده دواء الاعصاب
خارج وطنا السفر مشروع
يبغى دراسه وصف حساب
إما طلع له هدف منفوع
ولا هوى صاحبه لعاب
راع الهوى بالسفر مولوع
مايتوب حتى يشيب غراب
لو قيل من ذا السفر ممنوع
صاح المعنى وقلبه ذاب
صار يتخبط كما المصروع
براسه يطق الجدر والباب
لاجل السفر موتره مبيوع
وقروض شايل من الاصحاب
الطين زاده بلل وميوع
شال الوليه بدون حجاب
الغيره غارت كما الينبوع
والباب فاتح بلا بواب
بعض السفر بالاثم متبوع
واللي رجع بالاثم وش جاب
الشافعي لو رأي الموضوع
صادر كتابه وجاب كتاب
بمكة وطيبه أجر مجموع
وابها بلد صيفها جذاب
كنز السعاده مابين ضلوع
فالقلب ماهو بدار اجناب
الدرب نوره قمر وشموع
يارب كثر ذوي الالباب
وجهة نظر والغلط مرجوع
فكر وتناصح وحب أحباب