الشاعر مجيديع بن علي الشريف يرد على قصيدة الشاعر سعيد الصحفي في رثاء عطاالله بن غنام المغربي -رحمه الله-:
أنتم فقدتم شخص أعز انسان
وحنا كماكم برضنا فاقدينه
…………………
والموت لا من جاء ما عنه مزبان
وهذا قدر وحنا القدر مرتضينه
…………………
وأبو سعود يبقى على مر الأزمان
تاج على رؤوس العرب شايلينه
…………………
إنسان طييه حيّر الإنس والجان
إنسان طبعه كلكم عارفينه
…………………
صايم مصلي مبتسم وين ما كان
الطبع واحد في قساته ولينه
…………………
للضيف راعي جود وللضعف معوان
وراعي شهامة كلنا خابرينه
…………………
إنسان واضح يشبه الصبح لا بان
له طلةٍ يسعد بها ناظرينه
…………………
الله يغفر له ويعلي له الشان
ويمسح عنه كل ما يضر ويدينه
…………………
ويسكنه ربي بين أنهار وجنان
ويجعل كتابه يوم يؤتى بيمينه
…………………
وصلوا على خير البشر ولد عدنان
وعلى أهل بيته وصحبه وتابعينه