قصيدة رداً على قصيدة الشاعر صبحي المعبدي بعنوان “قصيدة مهداة للصحاف في مجلس صلح“
يا مرحبا ترحيب حشمة وتقدير
باللي لهم في ساحة الطيب طاله
****
قومن لهم في كل محفل مسايير
الفرد منهم عن جماعة لحاله
****
اخوان فزعه ما يهابون المحاذير
وليا نخاهم محتمي طاب فاله
****
ياقف له أصغرهم ولا فيهم صغير
ولا ينشده وش فيه ولا كيف حاله
****
حتى يواجه عندهم خير تدبير
ويرمي هموم الوقت ويرتاح باله
****
يا عسكر البارود وقفاتكم غير
لو الكرم رجال فانتم عياله
****
ياشيخ مثلك ما يجي منه تقصير
ولا يهون ربعك كاسبين الجماله
****
خطوتك تكفي لا تجيب المعاذير
ومن له غرض ب يدين الأجواد ناله
****
رفيقنا لا اخطا ما نبي منه تبرير
ومن قدم المعروف للناس جاله
****
واللي مايذخر للأجاويد تسعير
يعيش ما بين المخاليق عاله
****
لا يقضي للمحتاج حاجة ولا يجير
يشناه قومه ويجحدونه عياله
****
وصلوا على المبعوث رحمة وتيسير
الصادق المصدوق وصحبه وآله
———–
إبراهيم أحمد الصحفي