“مرثية في عمي يوسف بن عبيد – يرحمه الله -“
في نصف شهر الصوم جتنا رسايل
كبير أسرتنا له الحق وافاه
••••••
يارب ندعيك معطي الجزايل
تجعل أبو محمد على خير مثواه
••••••
حنا نقول الخير والغير قايل
حسب ما عرفنا وبالبصر فيه شفناه
••••••
العم مسالم ما يحب المشاكل
وكل ما عمل معروف فالناس ينساه
••••••
يرعى حقوق الجار للرحم واصل
صاحب تواضع والكبر ما تحلاه
••••••
مع والده قدم جميل الفعايل
فالدرب عينه ولمطلب الرزق يمناه
••••••
ماهمته شهره وحضور المحافل
ولا يترك الماجوب لنكان ينصاه
••••••
يا عمنا يرحمك رب الفضايل
اللي على خلقه تكرم برحماه
••••••
كل حي من دنياه له يوم راحل
لو طالت الأيام ياجي له سراه
••••••
ويا حظ من هو عاش للخير عامل
محافظ على التوحيد والفرض صلاه
••••••
بذال للمعروف راعي جمايل
راجي من الرحمن بالخير يجزاه
••••••
ويا تعس من هو عاش للشر ناقل
تارك يمين الخط ويمشي بيسراه
••••••
للناس يرمي زنود الفتايل
يرمي بزنده ويندس بمخباه
••••••
مصير ظل الشر في يوم زايل
ولا بد سهم السوء يرجع لمرماه
••••••
وتعداد ما هلت ثعول المخايل
صلوا على محمد ويازين ذكراه
•••••• •••••• •••••• •••••• •••••• ••••••
عبدالرحيم بن إبراهيم الصحفي